കണ്ണാ പിറക്കുക വീണ്ടും

കണ്ണാ പിറക്കുക വീണ്ടും പുതിയൊരു 
ധർമ്മയുദ്ധം നയിക്കാനായ് 
കാളിന്ദിയിൽ കാളിയന്റെ പരമ്പര 
കൊടിയ വിഷം കലക്കുന്നു 

കാളിന്ദി വീണ്ടും തെളിനീരൊഴുക്കിടാൻ 
കാളിയനെ തുരത്തേണം 
ഉച്ഛിഷ്ട യാഗപ്പുരയിലെ നഞ്ചുണ്ട് 
രോഗങ്ങൾ പോറ്റുന്നു ഞങ്ങൾ 

പാല്ക്കുടം വറ്റുന്നൊഴിയുന്നുറികളും 
അന്നക്കലവും അടുപ്പിൽ 
ഉണ്ണിച്ചിരികൾ നിലയ്ക്കുന്നു കുടികളിൽ 
ഒഴിയുന്നു കാലിത്തൊഴുത്തും 

കുന്നു തുരന്നു വിഴുങ്ങുന്ന ദാനവൻ 
വീഴ്ത്തുന്നു മാമരക്കൂട്ടം 
നീരിന്നുറവകൾ വറ്റി വരളുന്നു 
കരിയുന്നു യദു വനച്ചോല 

ഉച്ചി പിളർക്കും വെയിലേറ്റു മാനവർ 
ചത്തുവീഴുന്നിതോ കഷ്ടം! 
കാച്ച്ത്തിളച്ചുയരുന്ന കടൽത്തിര 
ഭൂമി വിഴുങ്ങുന്നുവല്ലോ 

മഴയത്ത് ഗോവർദ്ധനം കുടയാക്കി നീ 
യാദവർക്കഭയമേകീലേ 
ഇന്നിതാ ദാഹിച്ചു വലയുമിവർക്കു നീ 
മഴമേഘക്കുട കൊണ്ടു പോരൂ 

സന്ധ്യാദീപങ്ങൾ കെടുന്നതിൻ മുമ്പു നീ 
സാന്ത്വനമായ് വന്നു ചേരൂ.