Tuesday 26 June 2012

മകളേ ശ്രവിക്കുക

മകളേ കേൾക്കുക, ഞാനിന്നു ചൊൽവത് 
നിത്യം മനസ്സിലെ മന്ത്രമായ് കാക്കണം 

നല്ലതു മാത്രം നിനച്ചും നിവർത്തിച്ചും 
എന്നുമേയുണ്മതൻ ആൾ രൂപമാവണം 

ഗുരുപൂജ ചെയ്തീശ്വര ബന്ധുവാകണം 
ദൈവഹിതത്തെയനുസരിച്ചീടണം 

മാതാപിതാക്കൾ തൻ ഇച്ഛ കാത്തീടണം 
മൂത്തവരോടാദരവു കാട്ടീടണം 

അന്യരോടെന്നും വിനയമുണ്ടാവണം 
സ്നേഹ മൊഴികൾ നിൻ മുദ്രയായീടണം 

കനിവിൻ നിറവായി നീ മരുവീടണം 
സഹജീവികൾക്കിഷ്ട സാന്നിദ്ധ്യമാവണം 

ദുഷ്ടരെ നൽ വഴി കാട്ടീ നയിക്കണം 
ദീനർക്കു കൂടപ്പിറപ്പായി മേവണം 

ഇല്ലായ്മയിൽ തളരാതെ മുന്നേറണം 
ഉള്ളതു കൊണ്ടു നീ ഓണം വിളമ്പണം 

അക്ഷര ദീപം തെളിച്ചു നീയുള്ളിലെ 
അന്ധകാരത്തെയകറ്റി വിളങ്ങണം 

സത്യവും നീതിയും ശക്തിയാക്കീടണം 
ക്ഷമയും സഹനവും ആയുധമാക്കണം 

നിത്യപ്പരിശ്രമത്താലെ ഉയരണം 
വിശ്വൈകതാരകയായിത്തിളങ്ങണം 

മകളേ ശ്രവിക്കുക, ഞാനിന്നു ചൊൽവത് 
നിത്യം മനസ്സിലെ മന്ത്രമായ് കാക്കണം.      
KAAVYABIMBANGAL-2010

No comments:

Post a Comment